कञ्चनपुरमा पचास महिलालाई बाख्रापलनका लागि अनुदान

रासस    

कञ्चनपुरमा पचास महिलालाई बाख्रापलनका लागि अनुदान
फाइल फाेटाे

कञ्चनपुरः विपन्न परिवारका महिलालाई आर्थिकरूपमा सवल बनाई घरेलु हिंसा न्यूनीकरणमा सघाउ पुऱ्याउन शुक्लाफाँटा नगरपालिकाका ५० महिलालाई बाख्रापालनको लागि अनुदान रकम उपलब्ध गराइएको छ।

नगरपालिकाको वडा नम्बर २ र १२ का  महिलालाई सीप तथा व्यावसायिक विकासका लागि  बाख्रापालनसम्बन्धी सात दिने तालिम उपलब्ध गराई अनुदान रकम उपलब्ध गराइएको हो।

तालिममा सहभागी महिलालाई  तीन हजारका दरले अनुदान रकम उपलब्ध गराइएको छ। आधा रकम नगरपालिकाको महिला शाखाले र आधा रकम तालिममा सहभागी महिलाले बाख्रापालनका लागि व्यहोर्ने सहमति गरिएको छ।

महिला आर्थिकरूपमा सक्षम भए घरेलु हिंसाका घटना कम हुन्छन्, नगरपालिकाको महिला शाखाका प्रमुख कमला जोशीले भनिन्, "महिलालाई आर्थिकरूपमा सक्षम बनाउनकै लागि सात दिने तालिमसँगै अनुदान रकम उपलब्ध गराएका छौँ।"

नगरपालिकाको दुवै वडाका २५/२५ महिलालाई छुट्टाछुट्टैरूपमा तालिम प्रदान गरिएको उनले बताइन्। घरेलु हिंसा न्यूनीकरणमा सघाउ पुऱ्याउनुका साथै महिलाको सामाजिक, आर्थिक अवस्था सुदृढ गर्ने, बचत बढाउनका लागि सीप क्षमताको विकास गर्ने र उत्पादनशील क्षेत्रमा पूँजी परिचालन गर्नका लागि उत्प्रेरित गर्न तालिमसँगै अनुदान रकम दिइएको उनको भनाइ छ।

नगरपालिकाको महिला शाखाले गठन गरेका महिला विकास समिति, संस्था र समूहमा आवद्ध महिलाले अनुदान रकम पाएका छन्।

पशु शाखाका पशु विकास अधिकृत रामदत्त भट्टले सात दिने तालिमका क्रममा महिलालाई उन्नत बाख्रपालनसँगै खोर सुधारबारे जानकारी दिइएको बताए। 

व्यवसाय प्रवद्र्धन गर्नका लागि आवश्यक पर्ने सीपसमेत महिलालाई सिकाएका छौँ, उनले भने,"बाख्रापलनमा संलग्न हुने महिलालाई आहार व्यवस्थापनबारे समेत जानकारी दिइएको छ।"

हाडनाताबाट जन्मने बाख्रा ख्याउटे हुने, गर्भ तुहिने र वृद्धि विकाससमेत कम हुने भएकाले क्रस ब्रिडिङ गराउनुपर्ने कुरा सिकाएका छौँ, उनले भने,"सन्तुलित घाँस व्यवस्थापन गर्नका लागि डालेघाँस, कोशे–अकोशे जातका घाँस लगाउनुपर्ने र सन्तुलित दाना बाख्रलाई खुवाउनुपर्ने कुरा तालिमका क्रममा बताएका छौँ।"

दुवै वडाका महिलालाई एक लाख ५० हजार रकम अनुदानका रूपमा दिइएको छ।



मङ्गलबार २०, माघ २०७७ ०१:३० मा प्रकाशित

प्रतिकृया दिनुहोस


Copyright © 2019 - najiknews.com.