अभिनेत्री कोइरालाको ‘जिजीविषा’ कृति सार्वजनिक

नजिक न्युज संवाददाता    

अभिनेत्री कोइरालाको ‘जिजीविषा’ कृति सार्वजनिक

काठमाडौँ : अभिनेत्री मनीषा कोइरालाको बेस्ट सेलर कृति ‘हिल्ड’ को नेपाली अनुवाद ‘जिजीविषा’ सार्वजनिक भएको छ ।  उक्त पुस्तक फाइनप्रिन्टले प्रकाशन गरेको हो । कृति अनुवाद भने कान्तिपुर दैनिकका पत्रकार स्वरूप आचार्यले गरेका हुन् । सोही पुस्तकको भिडियो लन्चका अवसरमा अभिनेत्री कोइरालाले भनिन्, ‘मैले यो किताब लेख्छु भनेर सुरु गरेकी होइन ।

अमेरिकामा क्यान्सरको उपचारका क्रममा एक जना बौद्ध रिन्पोचेले आफूलाई क्यान्सरबाट परेको दु:ख भोग्दाका बेला तिमीलाई लागेका कुरा टिपोट गरिराख्नु भन्नुभएको थियो । यो पीडाको, यो कठिनाइको कुरा पनि लेखिराख्नू भनेकाले मैले त्यति बेलाका दु:ख अनि कष्टलाई टिपोट गर्दै गएँ । र त्यसलाई पछि पुस्तकका रुपमा ल्याएकी हुँ ।’

क्यान्सर लागेपछिका अनुभव समेटेर किताब लेख्ने र आफ्नो ज्ञान समाजलाई दिन सके जीवन सार्थक हुने सोचले पुस्तक लेखेको उनले बताइन् । उनले ‘ग्ल्यामरस लाइफ’मा दु:ख हुन्न भन्ने सोच समाजमा पाइए पनि त्यस्तो नरहेको उनले बताइन् । भनिन्, ‘मैले असाध्यै अप्ठ्यारो परिस्थिति पनि धेरै झेलेकी छु ।’ धेरैजसो मानिसको चाहना हुन्छ, आफ्नो जीवनको पर्फेक्सन मात्र देखाउने तर आफूले पुस्तकमा पर्फेक्सन देखाउनतिर नलागी ‘जीवनको तीतो सत्य’लाई प्रकटीकरण गरेको उनको भनाइ छ । ‘म जति अनेस्टली हुन सक्छु, पुस्तकमा त्यत्ति भएकी छु,’ उनले भनिन् ।

क्यान्सर लाग्नुअघि आफूले जीवनको त्यति महत्व नबुझेको र पछि मृत्युको नजिक पुग्दा यसको महत्वबारे धेरै जानकारी पाएको उनले बताइन् । उनका अनुसार क्यान्सरले पारेको अप्ठ्यारो परिस्थिति मात्र होइन, पुस्तकले जीवनका अन्य कठिनाइहरुलाई पनि सुक्ष्म रुपमा समेटेको छ ।



शुक्रबार १०, पुष २०७७ ०३:१४ मा प्रकाशित

प्रतिकृया दिनुहोस


Copyright © 2019 - najiknews.com.